حرامى أعاد شنطة طالب بعد اكتشاف مرضه.. وخد رقم موبايله

القاهرة – شيماء عبد الخالق

مشهد مميز للفنان أحمد حلمى فى نهاية فيلمه «زكى شان» حين تعمد المرور فى الشارع الذى تمت سرقته به عدة مرات، كنوع من الانتقام.. المشهد ذاته تكرر مع الشاب أحمد ياسر، الطالب بالفرقة الثانية بكلية الطب بمحافظة المنوفية، الذى اعتاد بعض اللصوص تثبيته فى شارع الزراعة المقابل لاستاد الجامعة، فى مرتين متتاليتين، ليصر الشاب على المرور للمرة الثالثة معلناً: «اللى يحصل يحصل».

كان أحمد عائداً فى ذلك اليوم من بيت صديق له، أنجز مجموعة من المشاوير قبل أن يقرر التوجه أخيراً إلى بيته: «كنت تعبان جداً وده أقصر طريق لبيتى؛ قلت إحنا فى رمضان، يعنى مش هالاقى حد وحتى لو لاقيت يحصل اللى يحصل.. دخلت الشارع، وفى نصه سمعت صوت موتوسيكل وقف ورايا بحوالی 10 متر، نزل منه واحد والموتوسيكل كمل وعدانی ووقف بعدی بـ10 متر تانيين».

هنا علم أحمد أنه على وشك التعرض لسرقة جديدة: «الشخص اللی كان ورايا شدنی من كتفی وحط مطواة فى ضهرى، واللی كان قدام قفل عليّا الطريق بالموتوسيكل.. توقعت اللى هيقوله طبعا، طلّع اللی معاك أو يشد السماعات من ودنی، أو ياخد الموبايل وأنا مكنتش هعترض وكنت هديهمله يعنی، بس فوجئت بيه بيسألنى «إيه ده؟ انت ماسك عكاز، انت مصلحة ومش هتتعبنا».. كان أحمد وقتها مصاباً بمشاكل فى غضاريف ظهره أجبرته على استخدام العكاز لفترة لا بأس بها، كما أن إصابته بفيروس «إيه» والصفراء جعلت قدرته على مقاومة السارقين شبه معدومة: «أخدوا الشنطة اللی علی ضهری، والموبايل وبدأوا يشوفوا اللى جواها قدامى، وكانت أول حاجة شافوها كيس الأدوية».
«أدوية إيه دى؟».. سؤال استنكارى من السارقين أجاب عنه الشاب ببساطة، لكن المفاجأة كانت فى رد فعل اللصوص: «إتأثروا جداً، وادونى كيس الأدوية، وكانوا خلاص هايركبوا فندهت عليه قلت له الشنطة فيها كتاب أصفر كدا -كتاب الهستولوجی- هاته بعد إذنك انت مش هتحتاجه فى حاجة عشان عندی امتحان يوم الأربع».. كلمات جعلت الحديث يبدأ بين اللصوص وأحمد: «أنا فى كلية طب، قلتها ومشيت، لقيته بينده عليّا وبيقول لی استنی! خد يا أصلی الشنطة والموبايل ومتزعلش منی، وقعد يهزر معايا شوية».
«أنا بعمل الموضوع ده غصب، البلد ظروفها صعبة والشغل مش جايب همه، يا ريت كان فيه شغلانة محترمة عمرى ما كنت هامشى أثبّت فى خلق الله».. كلمات سريعة من اللص جعلت أحمد يتعاطف معه لينتهى الحوار برقم اللص مع أحمد: «مشی معايا شوية هو وصاحبه وادانی رقم موبايله عشان لو احتجته فى خناقة أو أى حاجة بعد كده»!