My Mall مجلة للسياحة والتسوق والصحة
القاهرة _ منى ممدوح
بعدما أيّدت محكمة الأسرة في القاهرة قرارها بنسب توأم زينة لأحمد عز، خرج الأخير عن صمته، ليعلّق على الحكم الذي جاء لصالح زينة وطفليها. ووجه الفنان المصري رسالة إلى محبّيه عبر صفحته الشخصية على “إنستغرام” قائلاً: “مساء الفل يا عيلتي وأهلي، كتير سألوا عليا امبارح، وأنا بطمنكوا، أنا الحمد لله كويس وزي الفل، وراضي باللي ربنا كاتبهولي كله، أنا كمان مش بس راضي، أنا سعيد بالابتلاء اللي أنا فيه عشان واثق في ربنا وفي نصره عاجلاً او آجلاً، وإن اللي أنا فيه ده ماهو إلا رفْع درجات بإذن الله”.
وأضاف: “طبعا أنا لا أعلق على أحكام القضاء، ومش هاطلع اعمل دوشة ولا أتكلم، عشان أنا سايب حقي على ربنا العادل الحق. اللي بقولهولكوا دلوقتي هو نفسه اللي بقوله من أول يوم في القضية، وهافضل أقوله لآخر نفس في عمري، وبأشهد الله علي كلامي ده، بل وأقسم بالله العلي العظيم إني ماتجوزتهاش ولا رسمي ولا عرفي ولا شفهي ولا ثانية، وإن شالَّه يكون معاها ١٠٠ حكم و١٠٠ شهاده ميلاد، برضه مش ولادي”.
واختتم رسالته قائلاً: “بسم الله الرحمن الرحيم، وَلَا تَحْسَبَنَّ اللَّهَ غَافِلاً عَمَّا يَعْمَلُ الظَّالِمُونَ، إِنَّمَا يُؤَخِّرُهُمْ لِيَوْمٍ تَشْخَصُ فِيهِ الْأَبْصَار، صدق الله العظيم”.
يذكر أنّ محكمة الاسرة كانت قد أسدلت الستار على قضية نسب توأم زينة لأحمد عز. وقضت برفض الاستئناف المقدم من عز ضد حكم أول درجة بنسب الطفلين له، ليحق لزينة استخراج شهادات ميلاد لهما باسم أحمد عز.
وردت الفنانة زينة بكتابة تدوينة مطولة على حسابها الرسمي على تطبيق إنستجرام، زينة وصفت أحمد عز بصفات سيئة خلال كلماتها، ووجهت نصيحة للفتيات عند اختيار شريك حياتهن.
وكتبت زينة قائلة:
الحمد لله:”
بشكر القضاء المصري العظيم اللي أظهر الحق الحمد لله عاوزة أوضح حاجة علشان الكذب المستمر، الحكم الحمد لله بيعتمد على إثبات الزواج وبناء عليه تم إثبات النسب أنا كنت ملتزمة الصمت واتعرضت للإشاعات الحقيرة وكنت بشوف اللي بيتقال عليا والحقيقة إني كنت واثقه في عدل ربنا الحمد لله .
الانتصار ده انتصار مش ليا لوحدي ده للستات كلهم القضية دي في منها كتير بس قضيتي اتحولت لرأي عام علشان أنا مشهورة والطرف التاني برده، نفسي كل ست مظلومة تاخد حقها حتى لو غلطت واتجوزت وأحد عديم الضمير والإنسانية وكداب بس كداب حتى في النفس اللي بيتنفسه، ربنا يكفي كل البنات شر عديمي الرجولة ويكرم كل البنات بناس محترمة تحافظ عليهم وأكيد في ناس محترمة كتير.
يارب يستر كل البنات ويحفظهم.
ربنا أظهر الحق الحمد لله وأنا عاوزه أعيش وأربي ولادي وأشوف شغلي وأنسى الأيام السودة اللي شفتها من أول الجواز لغاية يوم الحكم، مش عاوزة أسمع إسم أبو أولادي ده تاني ولا حتى حد يغلط فيه علشان مايصحش للأسف علشان ولاده، وربنا كبير ولسه حسابه عند ربنا الله يكون في عونه بقى ساعة الحساب اللي مافيهاش معجبات
فرحة الناس بظهور الحق أكتر حاجة حسستني إن الناس معايا أو تحديدا مع الولاد، مين ممكن يعادي أطفال ويظلمهم غير جاحد شيطان فرخه حتى ماحصلش دجاجه”.
